အိမ်ထောင်ဘက်နှင့် ကတ်ကင်းနာမည်

ဟိုးလွန်ခဲ့သော ၁၀ နှစ်လောက်ကလို့တော့ထင်သည်။ မဂ္ဂဇင်းတစ်ခုမှာ နာမည်နဲ့ပက်သက်ပြီးရေးထားတာလေးတစ်ခုတွေ့မိသည်။ နက္ခတ္တရောင်ခြည်က ဆရာဆုလှိုင်ရေးတာလို့ ထင်မိသည်။ သေသေချာချာ တော့ မမှတ်မိတော့ပါ။

ဘာလဲဆိုတော့ အိမ်ထောင်ဘက်အချင်းချင်း နာမည်တွေ ကတ်ကင်းမိရင်အိမ်ထောင်ရေးမြဲမြံကြောင်း

အိုအောင်မင်းအောင် ပေါင်းသင်းရကြောင်းရေးသားထားတာတွေ့ရသည်။

ဘာကြောင့်အိမ်ထောင်မြဲတာလဲ?

အခြားရောဘာတွေဖြစ်တတ်သေးလဲ?

စူးစမ်းမိ လေ့လာကြည့်ခဲ့မိတယ်။

အင်္ဂဝိဇ္ဇာသင်စဉ်တုန်းကလဲ ကတ်ကင်းနဲ ပက်သက်ပြီး သင်ခဲ့ရတာတွေရှိပါတယ်။ "ကတ်ကင်းသေရှင်လူ ထက်အောက်ပြန်လှန်ကူ"ဆိုတာမျိုးရှိပါတယ်။

ကတ်ကင်းကို ကောင်းအောင်သုံးလို့ရသလို ဆိုးအောင်လဲ သုံးလို့ရတာတွေ့ရပါတယ်။ ဒီနေရာမှာ အလုပ်အခက်အခဲဖြစ်နေသူကို လွယ်အိတ်လှူခိုင်းတာတွေ ၊ စိုးအောင်ဆိုတဲ့ ဆိုတဲ့နာမည်မျိုးကို သြဇာသားကို အိုးစည်ထုပြီးဆောင်ခိုင်းတာမျိုးတွေ ၊ အလုပ်နာမည် ဆိုင်နာမည် တွေကို မူလဇာတာကိုစစ်ဆေးပြီး သင့်တော်ရင်ကတ်ကင်းနာမည်ပေးတာမျိုးတွေ စတဲ့ ကတ်ကင်းကို အသုံးပြုနည်းတွေကအများကြီးပါ။

ကတ်ကင်းကသုံးတတ်ရင်အရမ်း အကျိုးပေးတာလဲတွေ့ရပါတယ်။

ဒီနေရာမှာလင်မယားအချင်းချင်းကတ်ကင်းမိတဲ့ ဆိုတာကိုပဲပြောပြမှာပါ။

နားလည်အောင်ပြောရရင်တော့

အမျိုးသားက အောင်လွင်ဆို အမျိုးသမီးက လွင်လွင်အေး ဆိုတာမျိုး

အမျိုးသားက ဝေမျိုး ဆိုရင် အမျိုးသမီးက မြတ်သက်ဝေ ဆိုတာမျိုး

အမျိုးသားက ထွန်းမင်းစိုး ဆိုရင် အမျိုးသမီးက ဇင်လဲ့နွယ် ဆိုတာမျိုး

စတဲ့ အမျိုးသားနဲ့ အမျိုးသမီး နာမည်အချင်းချင်း

ရှေ့နောက်ပြောင်းပြန်ကတ်ကင်း မိကြတဲ့ ချိတ်မိကြတဲ့နာမည်ရှင်တွေကို ဆိုလိုတာပါ။

(ဥပမာ အင်္ဂါနဲ့စပြီးစနေနဲ့ အဆုံးသတ်ထားတဲ့နာမည်က စနေနဲ့စပြီး အင်္ဂါနဲ့ဆုံးတဲ့ နာမည်တွေနဲ့ ကတ်ကင်းမိပါတယ်)

သီတင်းကျွတ်ပြီးတာနဲ့ မင်္ဂလာဆောင်ဖို့ အခါရွေးတာ ဇာတာတိုက်စစ်တာမျိုး ခဏခဏ အမေး များကြပါတယ်။ အဲဒီထဲမှာမှ အခုလိုကတ်ကင်းမိကြတဲ့ သူတွေကလဲ

ဆယ်ယောက်ထက်မနည်းတွေ့ရပါတယ်။ အဲဒါကြောင့်ပဲ ကျွန်တော်ဒီဆောင်းပါးလေးကိုရေးဖြစ်တာပါ။

သိပ်ပြီးဆိုးဆိုးရွားရွားအနေအထားမတွေ့ရင် ထိုအတွဲမျိုးကို လက်ထပ်ဖို့တိုက်တွန်းမိတတ်ပါတယ်။ ဘာဖြစ်လို့လဲဆိုရင် အိမ်ထောင်ရေးမြဲပြီး အိုအောင်မင်းအောင်ပေါင်းရတာများကြလို့ပါပဲဗျ။

ဘာကြောင့်ကတ်ကင်းမိတဲ့နာမည် တွေမြဲကြတာလဲလို့လေ့လာကြည့်တော့

လင်မယားနှစ်ယောက်မှာ တစ်ယောက်ကထူးထူးခြားခြား အရမ်းသည်းခံတတ်တာမျိုးတွေ့ရပါတယ်။ တစ်ဦးကပြဿနာရှာပြီး ဆိုရင်တစ်ယောက်က အလျော့

ပေးတာမျိုးခဏခဏမြင်ရပါတယ်။

ရှင်းရှင်းပြောရရင် လင်မယားနှစ်ယောက်မှာ တစ်ယောက်ကလူအေးတွေပေါ့ဗျ။

အဲလိုနာမည်ပြောင်းပြန်မိကြတဲ့ လင်မယားတွေကလဲ စီးပွားတတ်တာမျိုး တော်တော်များများတွေ့ရပါတယ်။ ဟုန်းခနဲ ထပြီး စီးပွားဖြစ်တာမျိုးမဟုတ်ပါဘူး။ ဖြေးဖြေးချင်းတရိပ်ရိပ်နဲ့တတ်တာမျိုးပါ။

ထိုကတ်ကင်းမိတဲ့အိမ်ထောင်ဘက်တွေက အသက်လဲရှည်ကြပါတယ်။ နှစ်ဦးစလုံးသက်တမ်းစေ့နေသွားကြရတာမျိုးပါ။

အဆုံးသတ်အနေနဲ့ပြောချင်တာက နာမည်အချင်းချင်း ကတ်ကင်းမိကြတဲ့အိမ်ထောင်ဘက်တွေဟာ အများအားဖြင့် အိမ်ထောင်ရေးသာယာမှု စီးပွားဖြစ်ထွန်းမှု အသက်ရှည်ကြမှုတွေရှိကြပါတယ်လို့ပြောရင်း မိမိသိသမျှတင်ပြလိုက်ရပါတယ်ဗျ။

ငြိမ်းအေးလူ ဗေဒင်သုတေသီ